రుబాయీలు
1 *** ***
సెలవులనీ వెళ్తానంటావా అవ్వగారి ఇంటికే
సరదాగా వెళ్లొస్తానంటావా స్నేహితుల ఇంటికే
ఒక్కసారి నువ్వే గడపదాటి అడుగు బయటవెట్టి చూడు
ఎవరికి కనవడకుండ సరాసరి వల్లకాటి ఇంటికే..
2 **** ****
గుంపుగూడి ముచ్చట్లేవో పెడదామంటావా
అంతా కూడి ఆటలేవొ ఆడదామంటావా
నలుగురు కూడే దారికాదు; కరోన మహమ్మారి!
సోంచాయించు జెర, ఇంట్లనే కూసుందామంటావా!
3 *** ***
బ్రహ్మ విష్ణు మహేశ్వరులకు ప్రతిరూపం
మాస్క్, గ్లౌస్, శానిటైజర్లతో సహవాసం
కాదుకూడదని గాలికి తిరిగావే అనుకో?!
కనబడని కరోనరక్కసికి నువె ఫలహారం
4*** **
మనిషి మనిషిని బ్రతికించేదే దూరం
మనసు మనసును ముడిపెట్టేదే దూరం
విషపుగాలి వ్యాపిస్తుందని తెలుసును కదా
ప్రపంచ పటాన నిను నిలబెట్టేదే దూరం
5****
ప్రపంచమంతా కడుక్కునే పనిలోనే ఉంది
కరోన కోరలు పీకాలనె కసిలోనెే ఉంది
స్వచ్ఛత పాఠం అసలు సిసలు సేవకదా;ఇపుడు
మనిషిమెదడులొ, శుద్ధగీతం శృతిలోనే ఉంది
6** **
రోడ్లకంపులు వీధిమురుగులు ఎవరికి కనిపించలేదా ఇన్నాళ్లు?
పట్టనట్టుగ ప్రతీఒక్కడు ఉమ్ముతూనె వెళ్లలేదా ఇన్నాళ్లు ?
రక్కసి ఒకటి కాటువేయగ, 'పరిశుభ్రత'న్నది ఎఱుకాయెనిప్పుడు?!
పారిశుద్ధ్య కార్మికులనే కసురుకుంటూ చూడలేదా ఇన్నాళ్లు?!
7* **
దుర్గంధపు వీధులన్నీ పరిమళాలు జల్లెనని గమనించవు ఎందుకు?/
చెత్తనిండిన రోడ్లపైన శుద్ధనవ్వు పూయించె, తిలకించవు ఎందుకు?/
కీర్తికీరిటాల హంగులేవో కోరలేదు వాళ్లెపుడు!"స్వచ్ఛ'మది" కద!!/
దేవుళ్లకు ప్రతిరూపం వాళ్లేనని నీవసలు గుర్తించవు ఎందుకు?/
8 ****
వేడిని పుట్టించలేని వాక్యమెందుకు నాకు
చైతన్యం రగిలించని కావ్యమెందుకు నాకు
లోపల తిడుతూ బయటకు నవ్వే వాన్ని కాదు
కుండనుబద్దలు కొట్టని పైత్యమెందుకు నాకు
9*****
ప్రతినిత్యం నవ్వాలని అనుకుంటే సరిపోతుందా
గాయాలని మాన్పాలని కూచుంటే సరిపోతుందా
ఎన్నిమైళ్లు నెత్తుటినడకలై సాగుతున్నయో చూడు
పత్రికలో ప్రకటనిచ్చి దులుపుకుంటె సరిపోతుందా ?!
10 ****
కోట్లకు కోట్లు ఏమయ్యాయని మెదళ్లనకుండా ఉంటాయా
మూటలుగట్టి దాచిపెట్టావొ, చెదలు తినకుండా ఉంటాయా
ఎంతగా దోచుకుంటేనేం; మనకెందుకంటావా "తగిరంచ"?!
మాడిన పేగుల అరుపులను "కలాల"సలు వినకుండా ఉంటాయా
11***
కొన్ని క్షణాలు ఎందుకో స్తబ్దుగా ఉంటాయి;
మరికొన్ని క్షణాలు మహాముద్దుగా ఉంటాయి;
ఎపుడేరీతిగ మారునో, ఈ వింత కాలం;
కొన్ని క్షణాలు జీవితాన హద్దుగా ఉంటాయి;
12***
కోట్లు కూడపెట్టుటకై ఎనలేని తాపత్రయం ఎందుకో /
హుండిలో ముడుపులువేస్తేనె, పుణ్యమనుకోవడం ఎందుకో/
సాటి మనిషికి సాయం చేయడం దైవత్వమని గుర్తించు;/
స్పందించే ఎడదచాలు; పై మెరుగుల సౌందర్యం ఎందుకో/
13***
ఆకలితో ఉన్నవాడికి అన్నంపెట్టే హృదయమే అసలు దైవత్వం/
ఆపదలో ఉన్నవాడిని ఆదుకునె మనస్తత్వమే
అసలు దైవత్వం/
ఏం వెంట తెచ్చుకున్నావని, ఆశలేవేవో పెంచుకుని గర్విస్తావు/
పదుగురి బ్రతుకులలో ఊపిరి నిలిపే మానవత్వమే అసలు దైవత్వం/
14****
ఆదాయమంతా ఏ గోదాముల్లో నలుగుతుందో..?!
వలసబ్రతుకు ఏ యినుపపాదాలకింద చితుకుతుందో ?!
చలువగదుల పన్నీటికి చెమటచుక్కల విలువ ఏం తెలుసు
ఆకలికడుపుల ఏ కాలకూటవిషం చిమ్ముతుందో ?!
*)15 ******
చెమటచుక్కలు ధారవోసి నల్లటి రోడ్లను కూర్చారు వాళ్లు..
కాలే కడుపులతోనే వీధులను తెల్లగ ఊడ్చారు వాళ్లు
మాటలతో బురిడికొట్టిస్తె సరి; వాళ్లతో మీకెందుకులే;
నడిచే పాదాలతోనే ఎర్రటి రంగును వేశారు వాళ్లు
**16**
ఎవరు చూడలేదని తెగ సంబరపడుతూ ఉన్నావా ?
పాపమేదైతేనేమని, లాభపడుతూ ఉన్నావా ?
అంతరాత్మను మించి అసలు న్యాయస్థానం ఎక్కడుంది?!
కుళ్లు బుద్దితో ఇంత నాటకమాడుతు ఉన్నావా ?!
17*****
చేసేది మంచో చెడో తెలిసేది ఎలా అంటావా?
పాపమేదొ పుణ్యమేదొ, మోసేది ఎలా అంటావా ?!
నీ అంతరాత్మను నువ్వు అడిగిచూడవోయ్ మనసారా ..
పదిమంది మెచ్చే పనులు పరిచేది ఎలా అంటావా ?
18***
అసలుసిసలు కార్యమేదొ, కాదనక సాగవోయ్
నలుగురితో నడకలేవొ, లేవనక సాగవోయ్
నిన్ను నీవు నమ్ముకో, అంతరాత్మ దైవమే.!
సాటిమనిషి మేలుకై నువు జడవక సాగవోయ్
19**** ***
అక్షరాన్ని అణగదొక్కాలని చూస్తావా ?
పుస్తకాన్ని పనికిరాకుండా చేస్తావా ?
అహంకార పుఱ్ఱెలకు అంతం తప్పదులే
నీతి నియమాలనే అమ్ముకుని చస్తావా ?!
20 ***
రాక్షసులకు మనిషిరూపం పూస్తే, అది నువ్వేగా ?
పైశాచికానికి ప్రాణం పోస్తే, అది నువ్వేగా ?
పాతాళానికి పడిపోయె రోజు, దగ్గరలో ఉంది?!
కుటిలత్వానికి కుతంత్రం కలిస్తే అది నువ్వేగా ?!
21 ** *
పుస్తకం విజ్ఞానగని అన్న సంగతి మరిచిపోయావా ?
అధికారమదంతో బెదిరింపె గొప్పని మురిసిపోయావా ?
ప్రగతి పథమంటె ప్రజాహితమేనని గుర్తుంచుకో,రాస్కెల్..!
అక్షరాలను కూల్చి, నువు యోధుడినని
భ్రమపడి పోయావా ?!
22*** ****
అనుమానపు నవ్వులు మెరుస్తూనే ఉన్నాయి
అబద్ధాల వానలు కురుస్తూనే ఉన్నాయి
పూటకో అవతారంతో గుంటనక్కలెన్నొ ;
జిత్తులమారి పోట్లు పొడుస్తూనే ఉన్నాయి
23****
"తెల్ల"వారంగనే, "తెల్ల"ని బట్టలతో ఫోజులు
"చీకటి" అయ్యిందా, "నల్ల"ని పనులపై మోజులు
పైన పటారం-లోన లొటారం, ప్రబుద్దులు కద!
అలాంటోళ్లనె అందలమెక్కించె నేటి రోజులు
24*****
తాటిచెట్టంత ఎత్తుకెదుగుతానంటే, ఇతరులకు నీడనివ్వలేవు
నీడనిచ్చే మఱ్ఱిలాగ విస్తారిస్తానంటే, పండ్లనివ్వలేవు
మానవత్వంతో విస్తరించి, మహోన్నతవ్యక్తిలా ఎదిగిపో "తగిరంచ"!
హృదయమొక అనురాగవనమైతే చాలు; మోసాలకు జాడనివ్వలేవు
25****
మంచేదో, చెడేదో, మనిషికోమాట చెబుతూనే ఉంటారు
ముంచడమో, నిలిపడమో, ఎవరేదేదో చేస్తూనే ఉంటారు
మనలాగే మనమెపుడూ బ్రతకాలంటే కష్టమేనోయ్ ఇలలోన;
పూటకొక పుల్లవెట్టి కయ్యాలదారులు తీస్తూనే ఉంటారు.
**26****
కొలమానం కొలబద్దలోనే ఉంటుందంటే కష్టమే
బహుమానం వస్తువులోనే తెలుస్తుందంటే కష్టమే
మనసులోతు మమకారవిలువ లెక్కించామనుకుంటె కల్ల;
పై మెరుపులకే లోకం గులామవుతుందంటే కష్టమే;
27
ఆశలచెట్టు ఎప్పుడూ పూస్తూనే ఉన్నది
వేస్తున్న బిస్కట్లనలా చూస్తూనే ఉన్నది
సమాజం మొద్దునిద్రలో ఉందంటే మీ భ్రమ;
మోసాలకు తగు కాడును పేర్చుతూనే ఉన్నది
****
28
అక్కడక్కడ పిచ్చిగ మొరుగుతూనే ఉంటాయి కుక్కలు
కుటిలబుద్ధితో గోతులు తీస్తూనే ఉంటాయి నక్కలు
మనిషి మనిషిగా బ్రతకాలంటె ఎన్నెన్ని ఆటుపోట్లో!?
తప్పక పాఠాలను నేర్పిస్తూనే ఉంటాయి చిక్కులు
**29
తొలకరి జల్లులతడిని మరిపించేది.. ఏముంది
మట్టివాసనను మించి మురిపించేది.. ఏముంది
పచ్చనిపంటలన్ని పుడమితల్లి నవ్వులు కదా
బురదమడి కన్న స్వర్గమనిపించేది.. ఏముంది!
..***30
కదలలేని శిలలు శిధిలమవుతూనే ఉన్నాయి
పక్షులెపుడు పైపైకి.. ఎగురుతూనే ఉన్నాయి
చైతన్య స్రవంతివై సాగితేనె విజయం కద!
తడబడక చేపలలా ఈదుతూనే ఉన్నాయి
** 31
కలం-కాగితాలపైకి మనసెందుకో కొట్టుకుంటుంది
కాస్త ఆ చరవాణిని బహుదూరంగా నెట్టమంటుంది
అక్షరాలకు పదునుపెట్టి కవనశిల్పమొకటి చెక్కాలి;
వాస్తవదృశ్యమై మానవత్వ ప్రాణం నిలుపమంటుంది
**32
'కాసు'లపేరు పై మోహమెందుకోయి ఓ మనిషి!
నవభవనములంటె మోజులెందుకోయి ఓ మనిషి!
మట్టిదుప్పటి కప్పుకొనెడి కాయమని తెలియదా!
తోడు నలుగురుండని బ్రతుకెందుకోయి ఓ మనిషి!
*** 33
గర్వకిరీటమెప్పుడో ఓ సారి నిను గంగలో ముంచుతుంది
ఆశలసౌధమెప్పుడో ఓ సారి నిలువునా కూల్చుతుంది
చావుబ్రతుకులలో తోడంటు నలుగురున్న బ్రతుకే ధన్యం!
స్వార్థఖడ్గమెప్పుడో ఓ సారి నీ హృదయాన్ని చీల్చుతుంది
**** 34
ఉంటేనేం పోతేనేం నలుగురికి ఉపయోగపడని బ్రతుకులు
ఉంటేనేం పోతేనేం నలుగురితో కూడి నడవని బ్రతుకులు
చివరిగమ్యం దాకా బ్రతుకుబండిచక్రాలు ఆ నలుగురే
ఉంటేనేం పోతేనేం నలుగురి మంచిని కోరని బ్రతుకులు
*** 35
*******
ఆటలపోటీ కాదు, కానీ; కాలం ఓడిస్తూనే ఉంది
ప్రేమబుుతువే; ఐతేనేం పసి పూలను కూల్చుతూనే ఉంది
కాలపరిస్థితులకు జడవక ఎదురీదడమే కదా జీవితం;
హృదయబంధమే; ఐనా అశ్రుధారను కురిపిస్తూనే ఉంది
******36
చీడలు పట్టిన పంటలు, చేతికి రావడము గగనమే
వేదన ముసిరిన మది, నిశ్చింతగ ఉండడము గగనమే
యుద్ధమేదైన ఇరువర్గాల్లో శాంతిని నింపలేదు
అశ్రువు జారక మనిషి జీవితం నడవడము గగనమే
****37
చూడడానికి ప్రపంచపటం శాంతిమంత్రంగా కనిపిస్తుంది
ప్రతీదేశ సరిహద్దురేఖ యుద్ధతంత్రంగా కనిపిస్తుంది
దెయ్యాలు వేదాలను సుకుమారంగ వల్లిస్తూనె ఉన్నాయి
పూటకోమాట కుర్చీకి రక్షణయంత్రంగా కనిపిస్తుంది
** 38****
చూడడానికి ప్రపంచపటం శాంతిమంత్రంగా కనిపిస్తుంది
ప్రతీదేశ సరిహద్దురేఖ యుద్ధతంత్రంగా కనిపిస్తుంది
దెయ్యాలు వేదాలను సుకుమారంగ వల్లిస్తూనె ఉన్నాయి
పూటకోమాట కుర్చీకి, రక్షణయంత్రంగా కనిపిస్తుంది
**** 39
కోట్లకు కోట్లు పడగలెత్తడమే లక్ష్యమాయెనా ?!
నోటికి కూడుకు బదులుగ "నోట్లే" భక్ష్యమాయెనా?
మనిషి మనుగడ కన్న "మనీ"మనుగడే సరాగమట;
ఉరుకులపరుగుల జీవనయంత్రమె సాక్ష్యమాయెనా?!
***40
ఔరా అంటే దొరా అన్నట్లు విన్పిస్తుందా..!
మెతుకులబతుకులు నువే కొన్నట్లు అన్పిస్తుందా!
గులేర్ గురిచూసికొడితె చచ్చి కింద పడాల్సిందే!
జనమింకా మీ మాయల ఉన్నట్లు కన్పిస్తుందా!
****41
కొత్తదో, మత్తుదో, వేగం పరిమితిని దాటేస్తుంది
చేతిలోని చరవాణి చెవిని ముద్దుగా వాటేస్తుంది
మితిమీరితె వేగమైన,మరేదైన ప్రాణాంతకమే;
నలనల్లనాగుంబామై తారురోడ్డు కాటేస్తుంది
No comments:
Post a Comment